Dyma le sy’n werth y byd,
yn cynnig croeso mawr o hyd,
lle i swatio’n gynnes, glyd,
lle i fynd am stori.
Dyma le i ti a mi,
i Mam a Dad, Mamgu, Tadcu,
bawb ohonoch dewch yn llu,
dewch i mewn am stori.
Nid oes angen ceiniog goch
i ddod i mewn, na chanu cloch.
Mae’r drws ar led am naw o’r gloch!
Dewch i ddewis stori.
Llyfrau ffeithiol rif y gwlith,
straeon antur yn eu plith,
stori ysbryd yn llawn rhith –
dyna beth yw stori!
Yma cewch fynd ar y we,
anfon ebost amser te,
chwarae gemau gwych – hwrê!
Mae yma fwy na stori.
Plantos bach yn canu’n braf,
sialens ddarllen yn yr haf,
gweld cymydog – sgwrs a gaf.
Dyma le am gwmni.
Dyma le sy’n werth y byd
yn estyn croeso mawr o hyd
lle i swatio’n gynnes, glyd,
llyfrgell i’w thrysori.
Casia Wiliam
